Кыргызстанда ветеринардык лабораториялар жана вакцина чыгаруучу завод курулат
Күн мурун Суу ресурстары, айыл чарба жана кайра иштетүү өнөр жайы министри Эрлист Акунбековдун төрагалыгында Кыргыз ветеринария илимий-изилдөө институтунун базасында курулуп жаткан BLS-2 жана BLS-3 коопсуздук деңгээлиндеги ветеринардык лабораториялардын курулушу боюнча жумушчу жыйын өттү.
Ведомствонун маалыматына ылайык, жыйында лабораториялык комплекстен тышкары биологиялык каражаттарды, анын ичинде вирустук жана бактериялык ылаңдарга, шарпка каршы вакциналарды өндүрүүчү заводду куруу маселеси талкууланды.
Ошондой эле антигельминттик каражаттарды чыгаруучу завод жана виварий комплексинин долбоордук документтерин даярдоо боюнча маселелер каралды.
Министр жооптуу тараптарга бардык маселелерди ыкчам чечип, техникалык талаптарды жана зарыл документтерди тез арада даярдоону, ошондой эле курулуш иштерин мүмкүн болушунча эртерээк баштоону камсыз кылуу милдетин койду.
Бул долбоорлор өлкөнүн ветеринардык коопсуздугун чыңдоого жана ата мекендик вакцина өндүрүшүн жолго коюуга багытталган.
