Ош облусунда 665 чет өлкөлүк жаранга айып пул салынды
Ош облусунда Кыргызстандын миграциялык мыйзамдарын бузган 665 чет өлкөлүк жаранга айып пул салынды. Бул тууралуу Улуттук коопсуздук мамлекеттик комитети билдирди.
Маалыматка ылайык, УКМК ички иштер органдары менен биргеликте миграциялык мыйзам бузууларды аныктоо жана чет өлкөлүк жарандардын мыйзамсыз эмгек ишмердүүлүгүнө бөгөт коюу максатында "Нелегал" аталышындагы рейддик иш-чараларды өткөргөн.
Рейддин жүрүшүндө түшүндүрүү жана профилактикалык иштерге өзгөчө көңүл бурулуп, чет өлкөлүк жарандарга өлкө аймагында жүрүүнүн тартиби жана коомдук тартипти сактоо талаптары эскертилди.
Текшерүүлөрдүн жыйынтыгында 2026-жылдын август айында миграциялык мыйзамдарды бузган 665 чет өлкөлүк жаранга айып пул салынды.
