Сузактын Кара-Булак айылында 150 орундуу жаңы мектеп курулду
Жалал-Абад облусунун Сузак районундагы Кара-Булак айылында 150 орунга ылайыкталган жаңы мектептин курулушу аяктады. Билим берүү мекемеси 2026-2027-жаңы окуу жылына карата пайдаланууга берилет.
Курулуш министрлигинин маалыматына ылайык, мектептин курулушу республикалык бюджеттин эсебинен каржыланып, долбоордун жалпы наркы 99 миллион сомду түздү.
Долбоорго ылайык, жалпы аянты 1281 чарчы метрди түзгөн мектеп эки кабаттуу болуп курулду. Анда заманбап окуу класстары, компьютердик класс, китепкана, ашкана, эмгек кабинети, жыйындар залы жана спорт залы каралган.
Мындан тышкары, окуучулардын сапаттуу билим алуусу жана ар тараптуу өнүгүүсү үчүн зарыл болгон шарттар түзүлдү.
Объекттеги курулуш иштеринин жүрүшү жана сапаты Турак жай-жарандык курулуш департаменти тарабынан көзөмөлдөнүп турду.
