Жаңы "Ош" базары толугу менен мамлекетке таандык болот
Жаңы "Ош" базары 100% мамлекетке таандык болот. Бул тууралуу Президенттин Иш башкармалыгынын башчысы Каныбек Туманбаев базардын курулушу менен таанышуу учурунда билдирди.
Иш башкармалыгынын маалыматына ылайык, учурда жаңы базардын курулушу болжол менен 90%га аткарылды.
Каныбек Туманбаевдин айтымында, базардын ишмердүүлүгү толугу менен санариптик форматка өткөрүлөт. Базар администрациясы менен соодагерлердин ортосундагы кызматтар электрондук форматта жүргүзүлүп, процесстердин ачык-айкын жана ыңгайлуу болушуна шарт түзүлөт.
"Жаңы Ош базары 100% мамлекетке таандык болот. Жакынкы убакта соодагерлерди эски базардан жаңы базарга көчүрүү иштери башталат. Ага чейин бардык соода орундар толук даярдалып, зарыл талаптарга жооп бериши керек", — деди Туманбаев.
Жаңы базарда соода аянтчалары, унаа токтотуучу жай, жүргүнчүлөр жана жүк ташуу үчүн лифттер, ошондой эле коомдук тамактануучу жайлар каралган.
Курулуш иштерин аяктап, жаңы "Ош" базарын жакынкы айларда пайдаланууга берүү пландалууда. Базардын аталышы өзгөртүлбөйт.
