Жумгалда уруксат документтери жок иштеген кафе буздурулууда
Нарын облусунун Жумгал районунда Түндүк-Түштүк альтернативдик унаа жолунун боюнда уруксат документтери жок иштеп келген коомдук тамактануу жайы буздурулууда. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, Мамлекеттик архитектура-курулуш контролдоо департаментинин Нарын региондук башкармалыгы тарабынан жол боюндагы тейлөө объектилерин мыйзамсыз жайгаштырууга жол бербөө максатында текшерүү жүргүзүлгөн.
Анын жүрүшүндө Түндүк-Түштүк альтернативдик унаа жолунун боюнда жайгашкан "Бай-Дан" кафесинин курулушка жана пайдаланууга тиешелүү уруксат документтери жок экени аныкталган.
Министрликтин маалыматына караганда, бул "Шаар куруу жана архитектура жөнүндө" мыйзамдын талаптарын бузуу болуп саналат.
Текшерүүнүн жыйынтыгында объекттин жооптуу тарабына билдирүү берилип, курулуш ченемдери жана талаптары боюнча түшүндүрүү иштери жүргүзүлгөн. Учурда объекттин ээси тарабынан кафе буздурулууда.
