Ош облусунда туризм ишкерлерине мыйзам талаптары түшүндүрүлдү
Бүгүн президенттин Ош облусундагы ыйгарым укуктуу өкүлүнүн аппаратынын демилгеси менен туризм тармагындагы ишкерлер үчүн практикалык семинар өткөрүлдү. Бул тууралуу өкүлчүлүктүн басма сөз кызматы билдирди.
Иш-чарага өкүлдүн биринчи орун басары Мирлан Орозбаев, тиешелүү мамлекеттик органдардын өкүлдөрү, эксперттер жана ишкерлер катышты.
Семинардын ачылышында Мирлан Орозбаев иш-чаранын негизги максаты - туризмдеги ишкерлердин көйгөйлөрүн эске алуу менен, мыйзам талаптарын түшүндүрүү жана ишкердикти мыйзамдуу жүргүзүү боюнча практикалык жардам көрсөтүү экенин белгиледи.
Анын айтымында, ишкерлерге керектүү маалыматты бир жерден алууга шарт түзүү жана туристтик объектилерди уюштурууда келип чыккан маселелерди чечүүгө көмөктөшүү маанилүү.
Семинарда туризм тармагындагы салык маселелери, жеңилдетилген насыя жана гранттык программалар, туристтик объектилерди куруу үчүн жер тилкелерин ижарага алуу тартиби, убактылуу курулмаларды курууга уруксат берүүчү документтер талкууланды.
Ошондой эле суу объектилеринин жээгинде курулуш жүргүзүү талаптары, санитардык-гигиеналык ченемдер, ажатканаларды орнотуу нормалары, экологиялык органдар, ӨКМ жана мамэкспертизанын корутундуларын алуу жол-жоболору боюнча маалымат берилди.
Катышуучулар өздөрүн кызыктырган суроолорду берип, мамлекеттик органдардан жана эксперттерден практикалык жоопторду алышты.
Белгилей кетсек, туризм тармагындагы ишкерлерге колдоо көрсөтүү жана административдик жол-жоболорду түшүндүрүү Ош облусунда туризмди өнүктүрүүдөгү маанилүү багыттардын бири болуп саналат.
