Бишкекте Шакиранын концерти тынч жана коопсуз шартта өттү
Кече “Бишкек Арена” улуттук стадионунда дүйнөгө белгилүү ырчы Шакиранын дүйнөлүк турунун алкагында концерти болуп өттү. Иш-чарага 40 миңден ашуун көрүүчү катышты. Бул тууралуу Бишкек шаардык ИИББнан кабарлашты.
Маалыматка ылайык, Стадиондун аймагында жана ага чектеш тилкелерде коомдук тартипти сактоо жана жарандардын коопсуздугун камсыз кылуу максатында 3 миңден ашуун милиция кызматкери тартылды. Укук коргоо органдарынын кызматкерлери күчөтүлгөн тартипте кызмат өтөп, иш-чаранын катышуучуларынын коопсуздугун жана коомдук тартипти камсыз кылышты.
Милиция кызматкерлеринин өз ара шайкеш иш алып баруусунун жана жарандардын жоопкерчиликтүү мамилесинин натыйжасында концерт тынч кырдаалда, эч кандай окуяларсыз өттү.
Ушундан улам Бишкек шаарынын Ички иштер башкы башкармалыгы борбор калаанын тургундарына жана конокторуна коомдук тартипти сактагандыгы, түшүнүү менен мамиле кылгандыгы жана милиция кызматкерлерине көмөк көрсөткөндүгү үчүн ыраазычылык билдирди.
