Чоң-Алайдан келген делегат Жекенди айылына заманбап логистикалык борбор курууну суранды
Ош облусунун Чоң-Алай районунан келген делегат Орозбай Абдилазизов 25-декабрда IV Элдик курултайдын алкагында Жекенде айылында заманбап логистикалык борбор куруу өтүнүчү менен кайрылды.
Анын айтымында, Карамык көзөмөл пунктунда реконструкция иштери жүргүзүлүп, ал расмий түрдө пайдаланууга берилген.
"Эгер көзөмөл пунктуна эл аралык макам берилсе, Кытай Эл Республикасынан Тажикстанга Чоң-Алай району аркылуу жүк ташуулардын көлөмү өсөт. Натыйжада Сары-Таш — Карамык автоунаа жолунда оор жүк ташуучу унаалардын саны кескин көбөйөт, — деди делегат.
Орозбай Абдилазизов Жекенди айыл өкмөтү Жекенди айылындагы 30 гектар аянттагы жер тилкесин (Жалгыз Арча участогу) өнөр жай, транспорттук инфраструктура, коопсуздук жана башка багыттар үчүн жер категориясына өткөргөнүн маалымдады.
Ал делегат аталган жер тилкесине заманбап логистикалык борбор курууну суранды. "Эгер мындай борбор курулса, бүгүнкү күндө дотацияда турган Жекенди айыл өкмөтүнүн өнүгүшүнө олуттуу түрдө жардам берет", — деп кошумчалады ал.
