Э.Гареев атындагы ботаникалык бакка футбол аянтчалары курулат
Э. Гареев атындагы Ботаникалык бактын Ахунбаев көчөсү жагында футбол аянтчаларын куруу пландалып жатканын Kaktus.media агенттиги Улуттук илимдер академиясына караштуу мекеменин маалыматына таянуу менен билдирди.
Ботаникалык бактын басма сөз катчысы Ажар Жабиеванын айтымында, Президенттин иш башкармалыгы борбордук кире бериштин сол тарабында, 7-Апрель көчөсүнүн боюнда эки футбол аянтчасынын курулушун баштаган. Учурда алардын пайдубалы куюлуп бүткөн.
"Ал жерде топурак таштак, – деди ал, – суу жок болгондуктан эч нерсе өспөйт. Бир нече жыл бою өсүмдүктөр отургузулса да, натыйжа болгон эмес".
Мындан тышкары, Жабиеванын маалыматына ылайык, ботаникалык бактын аймагында конференц-зал, амфитеатр, балдар аянтчасы жана воркаут-зона курулат. Ошондой эле чуркоо жолу, велосипед жолу жана өзүнчө жөө басуу үчүн жол салынат. Бул жолдорго атайын жумшак жабуу төшөлөт.
Президенттин иш башкармалыгы ботаникалык бактын бүткүл аймагына тамчылатып сугаруу системасын уюштуруу иштерин да улантууда.
Жабиева курулуштун качан аяктары жана бюджетинин көлөмү тууралуу маалымат жок экенин билдирди.
