Быйыл Бишкекте 14 мектеп курулат
Саудия өнүктүрүү фондунун 50 млн доллар өлчөмүндөгү насыянын эсебинен 14 билим берүү имараты куруларын Курулуш министринин орун басары Талантбек Иманакун уулу 22-январда Жогорку Кеңештин жыйынында билдирди.
Анын айтымында, жаңы мектептер жана кошумча корпустар курула турган жерлер аныкталган.
Бишкек шаарында курулуучу мектептер:
Биримдик Кут турак жай массивинде — 750 орундуу мектеп;
Алтын Ордо турак жай массивинде — 750 орундуу мектеп;
Новопавловка айылындагы 100 гектарлык участокто — 750 орундуу мектеп;
Орто-Сай айылында — 750 орундуу мектеп;
Улан кичи районунда — 750 орундуу мектеп;
Келечек турак жай массивинде — 360 орундуу мектеп;
Аламедин-1 кичи районунда (№38 мектеп) — 450 орундуу кошумча корпус;
Ала-Тоо турак жай массивинде — 1000 орундуу мектеп;
11-кичи райондо (№63 мектеп) — 360 орундуу кошумча корпус;
Койбагаров көчөсүндө (№26 мектеп) — 360 орундуу кошумча корпус;
Касым турак жай массивинде (№83 мектеп) — 650 орундуу мектеп;
Маевка айылында — 275 орундуу мектеп.
Чүй облусунда курулуучу мектептер:
Ысык-Ата жана Аламедин райондорунда — ар биринде бирден мектеп курулат.
Талантбек Иманакун уулунун маалыматына караганда, долбоорду ишке ашыруу 2026-жылы башталып, 2029-жылы жыйынтыкталат. Анын ичинде 2 жыл курулушка, 1 жыл кепилдик мөөнөткө каралган.
