Кызыл-Кыяда мыйзамсыз менчиктештирилип кеткен бала бакча мамлекетке кайтарылды
Баткен облусунун Кызыл-Кыя шаарында бала бакчанын имараты мамлекеттин балансына кайтарылганын УКМКнын маалымат кызматы билдирди.
Маалыматка ылайык, тергөө аныктагандай, 1996-жылы бала бакчанын жалпы аянты 533,3 чарчы метр жана 2 200 чарчы метр жер тилкесине ээ имараты "Нур-КМ" акционердик коомунун менчигине мыйзамсыз чыгарылган.
Ал учурдагы Кыргыз Республикасынын президентинин 1995-жылдын буйругу № УП-37 менен социалдык инфраструктура объектилери мамлекеттик же жеке менчик ишканалар тарабынан сатылбашы керектиги так жазылган. Бул эрежелер объекттер алардын балансына катталган же менчиктештирүү процессинде акысыз өткөрүлгөн болсо деле сакталчу.
Маалыматта белгиленгендей, социалдык объекттин мурунку ээси бала бакчанын имаратын жана жер тилкесин мамлекетке өткөрүп берген.
