Кытай адам сымал роботторду чыгаруу жагынан алдыда
Кытай адам сымал роботтордун дүйнөлүк рыногунда үстөмдүк кылып, орнотулган роботтордун 80%дан ашыгы ушул өлкөгө туура келерин South China Morning Post билдирет.
Маалыматка ылайык, AgiBot жана Unitree компаниялары Кытайга 2026-жылы дүйнөлүк рыноктун чоң бөлүгүн ээлөөгө жардам берет, ал эми 2027-жылга карата рыноктун көлөмү алты эсе өсөт.
Counterpoint компаниясынын маалыматына ылайык, 2025-жылы дүйнө жүзү боюнча 16 миң адам сымал робот орнотулган. Алар негизинен маалымат чогултуу, изилдөө иштеринде, ошондой эле логистика, өндүрүш жана автоунаа өнөр жайында колдонулган.
Изилдөө компаниясынын божомолу боюнча, 2027-жылга карата рыноктун көлөмү 100 миң даанадан ашат. Бул 2025-жылга салыштырмалуу алты эсе көп. Ошол эле учурда логистика, өндүрүш жана автоунаа тармактары жалпы орнотуулардын 72%ын түзөт деп күтүлүүдө.
"Жакынкы эки жылда адам сымал роботторду иштеп чыккан компаниялар аларды сериялык түрдө чыгара башташат. Алардын иштөө натыйжалуулугу бүткүл тармактын өнүгүү темпин аныктайт", — деп айтылат Counterpoint отчетунда.
