Илон Маск: Айда 10 жылдан кийин шаар пайда болушу мүмкүн
"Алгачкы шаар Айда жакынкы 10 жылдын ичинде пайда болушу мүмкүн. SpaceX бул максатты өзү үчүн эң артыкчылыктуу деп эсептейт" деп билдирди компаниянын негиздөөчүсү Илон Маск.
"SpaceX өз фокусун Айда өз алдынча өнүгүп кете ала турган шаар курууга бурду, анткени теориялык жактан биз бул максатка 10 жылдан аз убакытта жетише алабыз. Ал эми Марс тууралуу айтсак, ал үчүн 20 жылдан ашык убакыт талап кылынат", — деп жазды ал X социалдык тармагында.
Масктын айтымында, Марска учуу үчүн мүмкүнчүлүк терезеси ар 26 айда бир жолу ачылат жана жол жүрүү убактысы болжол менен алты айды түзөт. Ал эми Айга болсо ар 10 күндө бир жолу учууга болот, учуу убактысы болгону эки күндү алат.
Ошол эле учурда SpaceX компаниясынын негиздөөчүсү компания "Марста шаар курууга да умтуларын" жана "бул иш менен болжол менен беш–жети жылдан кийин активдүү алектене баштарын" белгиледи.
