Транспорттук текшерүүлөрдөн бюджетке 324 млн сом чогулду
Үстүбүздөгү жылдын 9 айында 7035 транспорт мыйзамдарын бузуу фактысы катталып, бюджетке 324 млн сом чегерилди. Бул тууралуу Транспорт жана коммуникациялар министрлигинин маалымат кызматынан билдиришти.
Транспорт жана коммуникациялар министрлигинин Жерде жүрүүчү жана суу транспорту департаменти тарабынан 2025-жылдын январь-сентябрь айларында 790 638 жүргүнчү ташыган жана жүк ташыган унаа текшерилген. Текшерүүлөрдүн жыйынтыгында транспорт мыйзамдарын бузган фактылар боюнча 7035 протокол түзүлдү.
Жалпы текшерүүлөр учурунда эл аралык келишимдердин талаптары, жүргүнчү ташуулардагы эрежелер, транспорт чөйрөсүндөгү мыйзам актыларынын сакталышы жана салмак-габариттик көзөмөл каралды. Бюджетке чегерилген сумма 324 млн 12 миң 262 сомду түзүп, 2024-жылдын 9 айындагыга салыштырмалуу 86,2 млн сомдон көп болду.
Текшерүү иштери өлкөдөгү транспорттук көзөмөл пункттарында, станциялык курулмаларда жана мобилдик топтор тарабынан жүргүзүлүп, транспорттук коопсуздукту камсыз кылуу максатында улантылат.
