Жүк ташуулардагы тартип бузуулар боюнча айып пулдардын суммасы 3 эсеге өскөн
2025-жылдын январь-октябрь айларында эл аралык жүк ташуулардагы тартип бузуулар боюнча 695 протокол түзүлгөнүн жана бул көрсөткүч 2024-жылдын ушул мезгилине салыштырмалуу 62,4%га жогору экенин Жер жана суу транспорту департаментинин маалыматында айтылды.
Жазылган айып пулдардын суммасы 3 млн 587 миң сомдон 10 млн 409 миң сомго өсүп, дээрлик 3 эсеге көбөйгөн.
Ведомствонун маалыматы боюнча типтүү эреже бузууларга:
- уруксат берүүчү документтерге жана маршруттарга болгон талаптарды сактабоо;
- жүк ташуу шарттарын бузуу;
- коштоочу бланктардагы каталар.
Тартип бузуулардын өсүшү транспорттук-көзөмөл пункттарындагы жана чек ара өтмөктөрүндөгү көзөмөлдүн күчөтүлүшүнө, ошондой эле машруттар, уруксат берүүлөр жана транспорт каражаттары боюнча маалыматтарды дал келтирүүнү жөнөкөйлөткөн процесстердин санариптешүүсүнө байланыштуу экени департамент билдирген.
