АКШ, Кыргызстан Макмал-Каракол темир жолун курууну талкуулады
Президентке караштуу Улуттук инвестициялар агенттигинде АКШнын All American Rail Group компаниясынын өкүлдөрү менен жолугушуу болуп өттү.
Жолугушуунун жүрүшүндө тараптар 2025-жылдын февраль айында келишимине кол коюлган мамлекеттик-жеке өнөктөштүк алкагындагы "Макмал – Каракол темир жолун куруу" долбоорунун ишке ашырылышынын жүрүшүн талкуулашты. Бул долбоор Кыргыз Республикасынын ички темир жол тармагын өнүктүрүүгө, ошондой эле Трансевразиялык транспорттук маршрутту мындан ары калыптандыруу жана интеграциялоо үчүн шарттарды түзүүгө багытталган.
Талкуу учурунда алдыңкы жана инновациялык технологияларды тартуу жана колдонуу, ошондой эле темир жол транспорту тармагындагы дүйнөлүк мыкты тажрыйбаларды пайдалануу маселелерине өзгөчө көңүл бурулду. Долбоордун ишке ашырылышы аймактардын транспорттук байланыштуулугун жакшыртып, өлкөнүн транзиттик мүмкүнчүлүктөрүн бекемдөөгө жана экономикалык өсүш үчүн кошумча шарттарды түзүүгө өбөлгө болот.
