Мамлекеттик автомектептерде окуучулар бекер окутулат
Мамлекеттик автомектептерде мектепти бүтүп жаткан окуучулар акысыз окутуларын президенттин Иш башкармалыгынын башчысы Каныбек Туманбаев “Кабар” агенттигине билдирди.
Анын айтымында, окуу мөөнөтү 10 айды түзүп, жалпы 320 сааттык сабактардан турат. Орто мектептердин 11-класстын окуучулары жаңы окуу жылынан баштап акысыз окуй баштайт.
"Курсанттар 4 айда жакшы окуп, мыкты натыйжа көрсөтсө тест тапшырып, ийгиликтүү өткөндөрүнө бир жылга убактылуу айдоочулук күбөлүк берилет. Эгер ал жыл ичинде жол эрежелерин бузбаса, туруктуу айдоочулук күбөлүк алат. Эгер эреже бузулса, калган окуу мөөнөтү кайра улантылат",-деди ал.
Туманбаев белгилегендей, 10 айлык окууну толук бүткөн жана экзаменди ийгиликтүү тапшырган окуучулар дароо туруктуу айдоочулук күбөлүк ала алышат.
