ӨКМ Түштүк Кореядан эки тик учак сатып алууну карап жатат
Өзгөчө кырдаалдар министрлиги (ӨКМ) Түштүк Кореядан эки жүк ташуучу тик учак сатып алууну карап жатканын өзгөчө кырдаалдар министринин биринчи орун басары Азамат Мамбетoв Sputnik агенттигинде өткөн брифингде билдирди.
Азамат Мамбетов анда жаңы тик учактар куткаруу бөлүмдөрүнүн ыкчамдыгын арттырып, алыскы жана барууга кыйын аймактарга гуманитардык, материалдык-техникалык жүктөрдү жеткирүүнү жеңилдетерин белгилеген.
Учурда ведомстводо үч аскердик тик учак бар.
“Акыркы беш жылда министрлик 7 млрд сомдон ашык каражатка 670 даана техника сатып алган. Эми дагы эки тик учак алуу боюнча сүйлөшүүлөр жүрүүдө”, - деген ал.
