Жүргүнчү ташуучуларды текшерүүдө 1,7 млн сом айып салынды
Жерде жүрүүчү жана суу транспорту департаментинин инспекторлору Бишкектеги "Ак-Кула" жана "Бишкек" автобекеттеринде жүргүнчү ташуучулардын ишмердүүлүгүн текшерди. Бул тууралуу Транспорт жана коммуникациялар министрлигинен билдиришти.
Текшерүүдө унаалардын техникалык абалы, шиналары, өрт өчүрүүчү шаймандары, ошондой эле айдоочулардын лицензиялары, патенттери жана камсыздандыруу полистери каралды.
Мындан тышкары, айдоочулардын медициналык кароодон өткөндүгүн тастыктаган жол баракчалары жана автобустар менен микроавтобустардын бекитилген график боюнча жүрүүсү текшерилди. Расмий каттоосу жок жана коопсуздук талаптарын сактабаган ташуучулар да көзөмөлгө алынды.
Маалыматка ылайык, 2026-жылдын 1-августуна карата өлкөдө Бишкек жана Ош шаарларын кошпогондо 853 автотранспорттук каттам катталган.
Жылдын алгачкы алты айында автобус жана микроавтобустар менен 296,8 млн жүргүнчү ташылган. Бул өткөн жылдын ушул мезгилине салыштырмалуу 6,8%га көп.
Ал эми 10-августка карата жүргүнчү ташуучуларды текшерүүнүн жыйынтыгында 1 159 протокол түзүлүп, 1 млн 773 миң 500 сом айып пул салынган.
