Бишкекте быйыл 120 чакырым жол курулуп, реконструкцияланат
Бишкекте 2026-жылы 120 чакырым автомобиль жолун куруу жана реконструкциялоо пландалууда. Мындан тышкары, 28,1 чакырым тротуар курулат. Бул тууралуу мэриянын коллегиялык жыйынында мэрдин биринчи орун басары Кубанычбек Иманалиев билдирди.
Маалыматка ылайык, акыркы жылдары борбор калаада жол куруу жана оңдоо иштеринин көлөмү кыйла көбөйгөн. 2021-жылга салыштырмалуу бул көрсөткүч 5 эсеге өстү.
Учурда Бишкектеги 136 участокто жолдорду жана тротуарларды куруу жана оңдоо иштери жүрүп жатат. Бүгүнкү күнгө карата 68 участоктогу иштер толугу менен аяктады. Анын алкагында 49,9 чакырым жол курулуп, реконструкцияланып, 9 чакырым тротуар пайдаланууга берилди.
Ошондой эле шаарда үч жер үстүндөгү жана төрт жер алдындагы жөө жүргүнчүлөр өтмөгү курулуп, пайдаланууга берилди. Учурда дагы бир жер алдындагы өтмөктүн курулушу жүрүп жатат. Мындан тышкары, дагы алты жер алдындагы өтмөктү куруу үчүн жер тилкелери аныкталды.
Транспорттук тыгындарды азайтуу максатында Чыгыш айланма жолунун курулушу улантылып, Батыш айланма жолунун долбоору иштелип жатат. Шабдан Баатыр жана Иманалы Айдарбеков көчөлөрүнүн кесилишинде жаңы жол-транспорттук түйүн курулууда.
Мындан тышкары, унаа токтотуучу жайларды санариптештирүү иштери жүрүп, QR-код аркылуу төлөө үчүн 1 172 маалыматтык такта орнотулду. Дагы 2 миң QR-такта орнотуу пландалууда.
"Орто-Сай" базарынын аймагында 245 унаага ылайыкталган жаңы унаа токтотуучу жай да пайдаланууга берилди.
