"Жыргалаңда" 8,5 чакырым айланма жолдун курулушу уланууда
"Жыргалаң" шахтасынын аймагында узундугу 8,5 чакырымды түзгөн айланма жолдун курулушу уланууда. Бул тууралуу "Ала-Тоо Резорт" ААКсынан билдиришти.
Учурда "Флюра-ТЕХ" компаниясынын адистери жолдун негизин даярдоо жана жер иштерин жүргүзүүдө. Анын алкагында жараксыз топурак алмаштырылып, өсүмдүк катмары тазаланып, таш төшөө жана жолдун негизин тегиздөө иштери аткарылды.
Ошондой эле жол жээгиндеги эңкейиштер түздөлүп, жер полотносун калыптандыруу иштери жүрүп жатат.
Мындан тышкары, сууну туура агызуу үчүн дренаж системасы орнотулууда. Учурда траншеялар казылып, дренаждын негизи даярдалып, таш материалдары төшөлүүдө.
Маалыматка ылайык, курулуш иштери атайын техникалардын жардамы менен долбоордук талаптарга ылайык жүргүзүлүүдө.
