Бишкектеги жаңы автобекет ушул айда пайдаланууга берилет
Бишкектеги жаңы автобекет сентябрь айында пайдаланууга берилет. Бул тууралуу Президенттин Иш башкармалыгынан билдиришти.
Маалыматка ылайык, кечээ Президенттин Иш башкармалыгынын башчысы Каныбек Туманбаев автобекеттин курулуш иштеринин жүрүшү жана объекттин даярдыгы менен таанышты.
Учурда курулуш иштеринин 95%ы аткарылды. Ички жасалгалоо иштери толугу менен аяктап, асфальт төшөө жана аймакты көрктөндүрүү иштери калды.
Жаңы автобекетте жүргүнчүлөр үчүн зарыл шарттар каралган. Анын аймагында соода түйүндөрү, аялдамалар жана унаа токтотуучу жайлар уюштурулат.
Объекттин жалпы аянты 30 миң чарчы метрди, ал эми автобекет жайгашкан жер тилкесинин аянты 16 гектарды түзөт.
Каныбек Туманбаев подряддык компанияга калган курулуш жана көрктөндүрүү иштерин белгиленген мөөнөттө сапаттуу аяктап, объектти расмий ачылышка толук даярдоо тапшырмасын берди.
"Объектини өз убагында бүткөрүү менен гана чектелбестен, бул жерде жарандар үчүн мүмкүн болушунча ыңгайлуу шарттарды түзүү маанилүү. Адамдар автобекетте болгон учурда эч кандай ыңгайсыздык жаралбашы керек", — деди ал.
