Транспорт тармагына квалификациялуу кадрларды даярдоо күчөтүлөт
Бүгүн Транспорт жана коммуникациялар министрлигинде жогорку окуу жайлардын жетекчилери жана өкүлдөрү менен жолугушуу өтүп, транспорт тармагын квалификациялуу кадрлар менен камсыз кылуу маселеси талкууланды.
Министрликтин маалыматына ылайык, жолугушууга транспорт жана коммуникациялар министринин орун басары Кубанычбек Турганбаев катышты.
Транспорт тармагында жол жана транспорт инфраструктурасын өнүктүрүү, коопсуздукту камсыздоо жана заманбап технологияларды киргизүүгө байланыштуу инженердик-техникалык адистерге суроо-талап өсүп жатканы белгиленди.
Айрыкча автомобиль жана темир жол транспорту, жол чарбасы, транспорттук инфраструктураны куруу жана эксплуатациялоо, ташууларды уюштуруу, жол кыймылынын коопсуздугу, автоматика, байланыш жана маалыматтык технологиялар багытындагы адистерге муктаждык жогору.
Тараптар окуу программаларын тармактын талаптарына ылайыкташтыруу, студенттердин өндүрүштүк практикасын жакшыртуу, тажрыйбалуу адистерди окуу процессине тартуу жана бүтүрүүчүлөрдү ишке орноштурууга көмөктөшүү маселелерин талкуулашты.
Ошондой эле министрликке жана ага караштуу уюмдарга керектүү адистерди максаттуу даярдоо мүмкүнчүлүгүн кароо сунушталды.
Кубанычбек Турганбаев жогорку окуу жайлар менен кызматташууну күчөтүү маанилүү экенин белгилеп, негизги максат транспорт тармагын кесипкөй жана заманбап талаптарга жооп берген адистер менен камсыз кылуу экенин билдирди.
