Бишкек шаарынын мэри жана шаардык кеңештин төрагасы айлык маяналарын үч эсеге көбөйтүп алышкан – Башкы прокуратура
Бишкек шаарынын муниципалдык кызматтарынын кызматкерлери социалдык көйгөйлөрдү чечүүгө жана шаардын инфраструктурасын жакшыртууга бөлүнгөн каражаттын эсебинен негизсиз эле эки айлык акы өлчөмүндө кошумча акча алышкан. Бул тууралуу Бишкек шаардык мэриясында жана шаардык кеңешинде коррупцияга каршы аракеттенүү мыйзамдарынын сакталышы боюнча жүргүзүлгөн текшерүүдө белгилүү болгонун Башкы прокуратуранын басма сөз кызматы жарыялады.
Маалыматка таянсак, Бишкек шаарынын бюджетинин болжолдонгон киреше бөлүгү жасалмалоо жолу менен көбөйтүлүп, муниципалдык кызматтардын функционалдык милдеттери өзгөчө маанилүү жана жооптуу жумуштарга теңдештирилип, эмгек акыларына 2 маяна өлчөмүндөгү үстөк акылар негизсиз кошулган.
Бишкек шаардык кеңешинин төрагасынын жана Бишкек шаарынын мэринин бир айлык маянасы 120 000 сом жана 150 000 сомго көбөйтүлүп, натыйжада, шаардагы социалдык маселелерди чечүүгө жана инфраструктураны жакшыртуу багытына сарпталуучу бюджеттик каражаттар мыйзамсыз сарпталган. 2019-жылдан 2021-жылдын апрелине чейинки аралыкта мамлекетке 214 581 700 сомдук зыян келтирилген.
Жогоруда көрсөтүлгөн зыян Бишкек шаардык кеңешинин төрагасы Ж.Абировдун жана башка жооптуу кызмат адамдарынын долбоорду талкуусуз бекиткенинен улам келип чыккан.
Аталган факты боюнча материалдар БП тарабынан КРнын Жазык кодексинин 320-беренеси (кызматтык абалынан кыянаттык менен пайдалануу) боюнча катталып, сотко чейинки өндүрүш иши башталды.
