Илон Масктын SpaceX компаниясынын өкүлдөрү Кыргызстанга келишти
SpaceX компаниясынын өкүлдөрү Кыргызстанга Санариптик өнүктүрүү министри Дастан Догоевдин чакыруусу менен келген. Компаниянын өкүлдөрүнүн иш сапары 25-26-июнда Starlink глобалдык долбоорунун алкагында болду. Бул тууралуу Санариптик өнүгүү министрлигинин басма сөз кызматы билдирди.
25-июнда, иш сапардын алкагында, Starlink Market Accessтин улук менеджери Брайан Шепис Догоевдин орун басары менен жолугушту. SpaceX глобалдык спутник системасы Интернетке жогорку ылдамдыктагы кең тилкелүү жеткиликтүүлүктү камсыз кылат.
Жолугушуунун жүрүшүндө, мүмкүн болгон кызматташтыктын негизги багыттары жана келечеги, санариптик инфраструктураны өнүктүрүү боюнча маселелердин комплекси талкууланды. Ошондой эле, алыскы аймактардагы социалдык объектилерди, мектептерди Интернет менен камсыз кылуу маселелери сүйлөшүлдү.
Мындан тышкары, санариптик инновациялык долбоорлорду илгерилетүү максатында КРда Starlink долбоорунун өкүлчүлүгүн ачуу боюнча процедуралык маселелер каралды.
Жолугушуунун жыйынтыгында, SpaceX техникалык талаптардын тизмеси боюнча кошумча маалымат сурап, дүйнөлүк Starlink долбоорунун алкагында мындан аркы жемиштүү кызматташтыкты өнүктүрүү боюнча макулдашышты.
Маалымдама
Starlink программасы дүйнө жүзү боюнча интернет байланышын өркүндөтүүгө жана кеңейтүүгө багытталган. Долбоордун алкагында SpaceX глобалдык интернет тармагын түзүү үчүн 11 миңден ашуун спутник учурууну пландаштырууда.
Жайгаштырылган тармак планетанын бүт калкын арзан жана тез спутник Интернет менен камсыз кылат. Секундасына 1 Гб ылдамдыгы 5G стандарттарына жооп берет. Starlink программасына инвестиция 10 млрд долларга бааланууда.
