Сауд өнүктүрүү фондунун акчасына Кыргызстанда төрт мектептин курулушу аяктады
Сауд өнүктүрүү фонду каржылаган «27 мамлекеттик мектептин курулушу» долбоорун ишке ашыруунун алкагында 4 мектептин курулушу аяктады. Бул тууралуу мамлекеттик курулуш агенттигинен маалымдашты.
Бекитилген план боюнча, бардык 27 билим берүү объектилери жылдын аягына чейин курулуп бүткѳрүлѳт. Ал эми азыркы учурда 4 мектептин курулушу бүткөн.
Бул объекттердин тендер боюнча жалпы сметалык наркы 25 млн 747 миң долларды түзөт. Анын ичинен бүгүнкү күндө фонд тарабынан 13 млн 640 миң доллар каржыланган, ал эми подряддык уюмдар тарабынан аткарылган иштин көлөмүнѳ ылайык, 15 млн 600 миң доллар өздөштүрүлгөн.
Белгилей кетсек, мектептердин курулушу өлкөнүн бардык аймактарында курулуп, 15 миңден ашык окутуу жайы менен камсыздоого шарт түзөт. Бишкек шаарында – 3 мектеп, Ош шаарында – 1, Ош облусу боюнча – 5 билим берүү объектиси, Чүйдө – 4, Ысык-Көлдө – 3, Жалал-Абадда – 3, Нарында – 3, Баткенде – 3 жана Талас облусунда – 2 мектеп курулуп жатат.
