Ошто DongFeng маркасындагы жеңил жүк ташуучу унаалар чыгарыла баштады
Ош шаарында «Кыргыз Унаа Курулуш» заводунда DongFeng маркасындагы алгачкы жолу жүк ташуучу машиналар чогултулуп баштады. Өндүрүштү ишке киргизүү салтанатына заводдун негиздөөчүсү Нурбек Осмонов жана Ош шаарынын мэри Таалайбек Сарыбашов катышканын түштүк борбордун мэриясынын маалымат кызматы кабарлады.
Ишкана заманбап жабдуулар менен камсыздалган. Бардык өндүрүш процесстери немец технологиялары менен жүргүзүлөт. Өндүрүштүк ишке Түркия жана Россиядан да адистер тартылган.
2018-2020 – жылдар аралыгында курулуш жана ишке киргизүү аракеттери жүргөн. 2020-жылдын ортосунан тарта биринчи продукциялар – электрогенераторлор жана электрокалканчтар, лифттер, темир эшиктер чыгарыла баштаган. Аталган ишкана ар кандай татаалдыктагы энергетикалык жана машина куруу жабдууларын долбоорлойт жана чыгарат. Жакынкы мезгилде электромобилдер чогултулуп баштайт.
Заводдун жетекчилиги берген маалыматка ылайык, завод рынокто лидерлик позицияда болууну, КРда өндүрүштүн өнүгүүсүнө салым кошууну көздөйт. Ишкананын өз конструктордук бюросу бар. Типтүү продукцияларды гана эмес, инвидуалдуу заказ менен нестандарттуу буюмдарды да жасай алат. Ишканада учурда 300дөн ашык адам эмгектенип жатат.
