Кыргызстанда ишкердик боюнча дүйнөлүк Чемпионат өттү – жеңүүчү байгеси 75 млн долларлык инвестиция алууга мүмкүндүк берген эл аралык финалга катышат

9-июлда Кыргызстанда экинчи жолу ишкердик боюнча дүйнөлүк Чемпионаттын (Entrepreneurship World Cup 2021) тандоо туру болуп өттү. Улуттук тандоо турунун финалында жалпы байгеси 1 млн долларлык жана 75 млн долларлык инвестиция алууга мүмкүндүк берген эл аралык финалга катышууга жергиликтүү стартап аныкталды. Бул тууралуу Ишкердик жана инновацияны Өнүктүрүү программасынын (PEAK) маалымат кызматы кабарлады.

Кыргызстандагы ишкердик боюнча дүйнөлүк Чемпионаттын финалында Jannat Garden Ecofarm биринчи орунду жеңип алды. Аталган стартап 2021-жылдын ноябрь айында өтө турган эл аралык финалда дүйнөдөгү эң мыкты 100 стартап тизмесине кирүүгө 200 мамлекеттен келген башка жеңүүчүлөр менен ат салышат.

Ошондой эле Jannat Garden Ecofarm стартапынын негиздөөчүсү Айсулуу Дүйшебаева ОБСЕнин программалык кеңсесинен өндүрүшкө жабдууларды сатып алуу үчүн 5000 евро өлчөмүндө накталай эмес грантты утуп алды.

Jannat Garden Ecofarm компаниясы – парфюмериялык-косметикалык каражаттар үчүн органикалык лаванда жана роза эфир майларын өндүрөт, ошондой эле органикалык мөмө-жемиштер жана кол менен жасалган буюмдар ишмердиги менен алектенет.

Болжол менен программага 50 стартап жана Кыргызстандын компаниялары катышып, алардын ичинен ону финалга чыккан.