Кыргызстан ЕБтен COVAX вакцинасын бөлүү процессин тездетүүнү суранды
Кыргызстан Европа Бирлигинен COVAX программасынын алкагында вакциналарды бөлүп берүү процессин тездетүүнү суранды. Бул өтүнүчтү КРнын Тышкы иштер министринин биринчи орун басары Нуран Ниязалиев өткөн жумада Европа Бирлигинин Борбор Азия боюнча атайын өкүлү Тери Хакала менен жолугушуусунда билдирди.
Тышкы иштер министрлигинин басма сөз кызматы билдиргендей, жолугушуу Ташкент шаарында өттү. Тараптар КР менен ЕБ ортосундагы өнөктөштүк жана кызматташтык жөнүндө жаңы макулдашууну ишке ашыруунун алкагында кызматташтыкты жана аны андан ары өнүктүрүү пландарынын келечегин талкуулашты.
ЕБ Кыргызстанга реформаларды жүргүзүүдө, анын ичинде 2021-2027-жылдарга карата көп жылдык жана региондук индикативдик программалардын алкагында ар тараптуу жардам жана колдоо көрсөтүүнү улантууга даярдыгын билдирди.
Тараптар ошондой эле Афганистандагы кырдаалды, өнүгүү жолундагы божомолдорду, өлкөдө тынчтыкты сактоо жана туруктуулукту орнотуу боюнча биргелешкен кадамдарды талкуулашты.
Алар 2021-жылы Бишкекте өтө турган Биринчи Европа Бирлиги – Борбор Азия экономикалык форумун даярдоого жана өткөрүүгө өзгөчө көңүл бурушту.
