Түштүк региондо 25 ишкер бизнес окууну аяктап, алдыңкы үчөө 4 млн сомдук инвестиция алышты
Ош шаарында мектепке чейинки 25 билим берүү мекемелери жана эрте курактагы балдарды өнүктүрүү борборлору Accelerate Prosperity бизнес-акселераторду ийгиликтүү аякташты. Бул тууралуу аталган уюмдун маалымат кызматы билдирди.
Жыйынтыктоочу күнү Ош, Жалал-Абад жана Баткен облустарынын ишкерлери өздөрүнүн бизнес долбоорлорун жана андан аркы инвестицияларды алуу стратегияларын сунушташты. Бизнес-акселератордун программасы USAID жана Ага Хан Фонду тарабынан каржыланган «Жергиликтүү өзгөрүү» долбоорунун алкагында уюштурулган.
Программага катышуу үчүн балдарды өнүктүрүү борборлорунан жана бала бакчалардан 120дан ашык келген арыздардын ичинен 30 компания тандалып алынган. Окуу курсун толугу менен 25 ишкер аяктады.
Катышуучулар Accelerate Prosperity командасынан бизнести кардарга багыттап куруу, мамлекеттик стандарттар жана балдарды эрте өнүктүрүүнүн саясаты, эл аралык Монтессори окуу программасы, баалуу сунуштар сыяктуу лекциялардын курстарын аякташты.
Катышуучулардын ар бирине жеке бизнес-трекерлер бекитилип, алар тренингдин жүрүшүндө катышуучуларды коштоп, бизнести өзүн-өзү диагностикалоо куралдары менен тааныштырышканын уюмдун маалымат кызматы кабарлады.
Программанын бүтүрүү иш-чарасында, Демо күнү, ишкерлер инвестиция алуу максатында, инвестициялык консультативдик комитетке бизнес долбоорлорун жана масштабдоо стратегияларын сунушташты. Мындан тышкары, питчингге ар кандай каржы институттар жана эл аралык уюмдардан өнөктөштөр жана USAIDдин «Конкуренттүү ишкана» долбоору, Highland Capital, FMFC жана башкалар инвесторлор чакырылган.
