Сеулдагы эл аралык көргөзмөгө кыргыз продукциялары коюлду
Сеулда өткөн импорттук товарлардын эл аралык көргөзмөсүндө кыргыз продукциялары да коюлду. Экономика министрлиги Кыргызстандын Кореядагы элчилиги жана ата мекендик компаниялар менен биргеликте жарманкеге кыргыз продукциясын жеткирүүнү камсыз кылды. Бул тууралуу аталган башкармалыктын басма сөз кызматы билдирди.
Көргөзмө Кореянын тийиштүү мамлекеттик органдарынын колдоосу менен Корея Импортерлор Ассоциациясы тарабынан уюштурулуп, 22-июлда башталып, 24-июлда аяктайт.
Бул көргөзмөнүн негизги багыты Кореядагы чет мамлекеттердин товарларын жана продукцияларын: айыл чарба продукцияларын, мөмө-жемиштер жана суусундуктар, балдар буюмдары, ашкана идиштери, үй буюмдары, зер буюмдары жана аксессуарлар, косметика, туристтик кызматтар жана башкаларды жергиликтүү калкка тааныштыруу.
Көргөзмөгө «Дары Тянь Шаня», Aman Greenfood, Bee Honey, «Семейный Плюс», «Насыйкат Исмаилова», «Кыргыз шоколады», «Арония Фарм» ЖЧКнын продукциялары коюлган.
