«Менин үйүм 2021-2026» турак-жай программасы ишке кирди – МИК
Мамлекеттик ипотекалык компания КРнын Министрлер Кабинети «Менин үйүм 2021-2026» турак жай программасын бекиткендигин кабарлады.
Турак жайдын жеткиликтүүлүгүн жогорулатуу Программанын төмөнкүдөй негизги багыттарын ишке ашыруу аркылуу жүзөгө ашат:
- мамлекеттик ипотекалык насыялардын пайыздык чендерин жылдык 4% га чейин акырындык менен төмөндөтүү, ошондой эле кийинчерээк сатып алуу менен турак жайды ижарага алуу механизмин иштеп чыгуу
- өлкөнүн жарандарын турак-жай менен камсыз кылуу үчүн, жеке турак жай фондун түзүү
- ипотекалык турак жайды насыялоо секторуна инвестицияларды тартуу боюнча эл аралык донорлор менен иштөө.
Мамлекеттик ипотекалык насыялардын пайыздык чендерин төмөндөтүү максатында, «МИК» ААК өнөктөш банктар менен алардын маржасын төмөндөтүү боюнча сүйлөшүүлөрдү жүргүзүп жатат.
Эгер буга чейин ипотекалык насыя жылдык үстөгү 6-8% менен 15 жылга берилип келген болсо, эми 4% менен 25 жылга чейинки мөөнөткө берилүүсү күтүлүүдө. Мурдагыдай мамлекеттик ишканаларда иштегендер жана аз камсыз болгондор деген чектөө болбойт, арыздар каалоочулардын баарынан кабыл алына берет.
Мындан тышкары, «кийинчерээк сатып алуу шарты менен ижарага берилүүчү турак-жай» жана «ислам принциптерине ылайык турак-жайды каржылоо» механизмдери иштелип чыгат.
