Чүйдө эгин талаасы кургап жатат – суу жок
Сокулук районундагы эгин талаалары суунун жетишсиздигинен кургап жатат. Бул тууралуу 24.kg агенттигине дыйкандар билдиришти.
Хасан Исаевдин айтымында, дыйкандар Жаңы-Жер аймагындагы Ат-Башы каналына кайрадан чогулуп, аталган көйгөйгө бийликтин көңүлүн бурууга аргасыз болушууда.
«Төрт айылга 1.5 куб көлөмүндө гана суу келүүдө, бирок 8 куб болушу керек болчу. Алар сууну кезек менен бере башташты, беш күн бир айылга, экинчисинде дагы беш күн башка айылга беришти. Бирок эл убада кылынган суунун көлөмү дагы эле берилбей жаткандыгына нааразы. Бир жумадан бери суусуз турдук, такыр эч нерсе жок. Суу түгөндү, эми болсо суу болбойт деп айтышты», – деп билдирди агентикке ал.
Белгилей кетсек, жаздан бери эле Чүй өрөөнүндө суунун жетишсиздиги дыйкандарды тынчсыздандырып келет жана алар буга чейин да митингге чыгышкан болчу.
Эскерте кетсек, буга чейин өкмөттүн ошондогу Чүй облусундагы ыйгарым укуктуу өкүлү Эркин Тентишевдин айтымында, акыркы 30 жылда сугат системасы талкаланган. Анын берген маалыматына ылайык, бир суу кудугун калыбына келтирүү үчүн 115 миң сомдон 150 миң сомго чейин каражат талап кылынат. Ал өз каражатынан бир канча суу арыгын калыбына келтирген жана депутаттарды да бул ишке салым кошууга чакырган болчу.
