Германиянын КРгы элчиси Моника Иверсендин дипломатиялык миссиясы аяктады
Кечээ, 29-июлда Тышкы иштер министри Руслан Казакбаев Германия Федеративдүү Республикасынын КРгы Атайын жана Ыйгарым укуктуу Элчиси Моника Иверсенди Кыргызстандагы дипломатиялык миссиясынын аяктагандыгына байланыштуу кабыл алды. Бул тууралуу ТИМдин маалымат кызматы кабарлады.
Тараптар кыргыз-герман мамилелеринин жогорку деңгээлин канааттануу менен белгилешип, өлкөлөр ортосундагы эки тараптуу кызматташтыкты өнүктүрүүнүн келечеги боюнча пикир алмашышты.
Тараптар өлкөлөрдүн ортосунда 2022-жылы дипломатиялык мамилелердин түзүлгөндүгүнүн 30 жылдыгын белгилөөгө даярдык көрүүгө, анын ичинде жогорку деңгээлдеги өз ара сапарларды уюштурууга өзгөчө көңүл бурушту.
Министр Руслан Казакбаев Элчи Моника Иверсендин Кыргызстан менен Германиянын ортосундагы саясий диалогду, соода-экономикалык жана маданий-гуманитардык мамилелерди чыңдоого кошкон салымы үчүн ТИМдин ведомстволук сыйлыгын тапшырды.
