КРнын экономикасына өзгөчө кырдаал алты айга киргизилет – депутаттар мыйзамды кабыл алышты
Кыргызстандын экономикасына өзгөчө кырдаал киргизилет. Жогорку Кеңештин депутаттары мыйзам долбоорун дароо үч окууда кабыл алышты.
Кыргызстанда өзгөчө кырдаал режими алты айга киргизилет.
Мыйзамга ылайык, экономикага өзгөчө кырдаал төмөнкү учурларда парламенттин макулдугусуз киргизилет:
- эгерде отчеттук мезгилде өткөн жылга салыштырмалуу баалар 3.5%га өскөн болсо
- эгер тышкы карыздын суммасы 10%га көбөйсө
- эгерде акыркы үч айда ИДПнын экономикалык компоненттери 10%га кыскарган болсо
- эгерде үч айдын ичинде тышкы соода жүгүртүүнүн көлөмү олуттуу төмөндөгөн болсо
- эгерде акыркы үч айда салык чогултуу 10%га кыскарган болсо
- эгерде акыркы чейректе инвестициялык абалдын начарлашы жана капиталдын 20%га чыгып кетиши байкалса.
Белгилей кетсек, коомдук талкуусуз жана жөнгө салуучу таасирин талдоосу жок эле демилгеленген бул мыйзам долбоору бизнес коомчулугуна жаккан жок.
Бизнес-омбудсмен бизнес коомчулугу бул мыйзам долбоору тууралуу ЖМКдан билгендигине нааразы болду. Робин Орд-Смит экономиканын калыбына келүүсүнө жетишүү үчүн мамлекет менен бизнес чөйрөсүнүн ортосунда диалог, анын ичинде бизнес чөйрөсүнө жана инвестициялык климатка түздөн-түз таасир этүүчү мыйзамдык демилгелерди коомдук талкууга салыш керек деп эсептейт.
Депутат Дастан Бекешев бул мыйзам долбоору министрлер кабинетинин ыйгарым укуктарын кеңейтүү максатында демилгеленген жана айрым ченемдер экономикалык туруктуулукка коркунуч туудурат деген пикирин айтты.
