Япония өкмөтү ЮНИСЕФ тарабынан ишке ашырыла турган COVID-19 пандемиясынын шартында балдарга сапаттуу билим берүү боюнча жаңы долбоор үчүн Кыргызстанга 2.7 млн доллар бөлүп жатат. Бул тууралуу ЮНИСЕФтин басма сөз кызматы билдирди.

Долбоор Билим берүү министрлигине мектептерде суу, гигиена жана санитардык иш-чараларды ишке ашырууда, анын ичинде гигиеналык жабдууларды сатып алууда жана япон практикасы менен тажрыйбасын колдонуу аркылуу гигиенага үйрөтүүнү колдойт. 

Мындан тышкары, ал мектептин жабылышы учурунда аралыктан билим алууга катыша албаган балдарга да колдоо көрсөтөт. Кошумча билим берүү программасы 2-4-класстын окуучуларына санарип технологияны жана санариптик окутууну киргизет жана саноо жана сабаттуулук боюнча окуу программаларын кеңейтет.