Үстүбүздөгү жылдын сегиз айында салыктан 66 млрд 131.7 млн сом чогултулган. Бул тууралуу Мамлекеттик салык кызматынын төрагасы Ильяз Иманбетов бүгүн маалымат жыйынында билдирди.

Анын берген маалыматына таянсак, план 2 млрд 985.3 млн сомго ашык аткарылган. 2020-жылга салыштырмалуу 18.1 млрд сомго, 2019-жылга салыштырмалуу 16.1 млрд сомго көп. Ал эми республикалык бюджетке – 53.5 млрд сом түшсө, жергиликтүү бюджетке – 12.5 млрд түшкөн.

Ал эми 2021-жылдын январь-июль айларында өлкөгө жеке адамдардын акча которууларынын таза агылып кирүүсү 31.1%га жогорулап, 1.1 млрд АКШ долларынын тегерегин түзгөн. Мындай маалыматты 2-сентябрда Улуттук банктын маалымат кызматы билдирген болчу.

Бирок жогорудагы көрсөткүчтөргө карабастан, 2021-жылдын январь-июль айларынын жыйынтыгы боюнча ИДПнын көлөмү өткөн жылдын ушундай эле көрсөткүчүнө салыштырмалуу 1.6%га төмөндөгөн.