2021-жылдын 10-сентябрында Түштүк Кореяда жапайы женьшень жана жалпысынан картаюуга каршы индустрияга арналган Эл аралык ЭКСПО көргөзмөсү ачылып, ага 13-өлкөнүн өкүлдөрү менен бирге Кыргызстан да катышууда. Бул тууралуу КРнын Кореядагы элчилиги билдирди.

ЭКСПО, жапайы женьшендин мекени болгон Хамян шаарында өтүп, ушул жылдын 10-октябрына чейин уланмакчы.

ЭКСПОнун алкагында Кыргызстандын желеги көтөрүлүп, КРнын органикалык продукциялары, анын ичинде бал, кургатылган жемиштер, кургак мөмөлөр, ошондой эле КРнын турмушта колдонуучу буюмдары көргөзмөгө коюлду.

Расмий ачылыш аземине Корея Республикасынын премьер-министри Ким Бу Гём, Кёнсан Намдо провинциясынын губернаторунун милдетин аткаруучу Ха Бёнг Пил, Хамяндын мэри Со Чунсу, Түштүк Кореянын Улуттук Ассамблеянын депутаттары, ошондой эле беш өлкөнүн элчилери, анын ичинде КРнын Корея Республикасындагы Элчиси Динара Кемелова катышышты.

Ошондой эле 4-октябрда ЭКСПОдо Кыргызстандын Улуттук күнүн өткөрүүсү каралууда, анын жүрүшүндө салтанаттуу иш-чаралар, кыргыз диаспорасынын өкүлдөрүнүн катышуусундагы концерт, Кыргызстандын экспорттук, инвестициялык жана туристтик потенциалынын презентациясы пландаштырылууда.