Аскер прокуратурасы УКМКдагы коррупцияны аныктап, 5 адам камалды

Кыргызстандын Аскер прокуратурасы тарабынан УКМКнын Бишкек шаары боюнча башкы башкармалыгынын мурдагы башчысы Ж.Э.Ж. башында турган коррупциялык топ аныкталганын ведомствонун басма сөз кызматы билдирди.

Маалыматка ылайык, аталган кызматкер УКМКнын өкүлдөрүнөн жана жарандардан турган туруктуу топ түзүп, жеке баюу максатында иш алып барган деп шектелүүдө. Бул факт боюнча "Коррупция" беренеси менен кылмыш иши козголуп, жалпы 5 адам кармалды. Биринчи май райондук сотунун чечими менен алар камакка алынды.

Жогоруда айтылган фактылардын негизинде УКМКнын Ички коопсуздук кызматы кызматтык иликтөө жүргүзүп, анын натыйжасында:

• 6 кызматкер улуттук коопсуздук органдарынан бошотулган;
• 6 кызматкер ээлеген кызмат ордунан алынып, УКМКнын карамагынан чыгарылды;
• УКМКда кызмат өтөөгө 1 талапкер четтетилди;
• УКМКнын 8 кызматкерине тартиптик жаза чаралары көрүлдү.

Жогоруда айтылган коррупциялык топко тиешеси бар УКМКнын башка кызматкерлерин аныктоо боюнча иштер уланууда.