Бүгүн, 20-сентябрда Эл аралык иштер, коргоо жана коопсуздук боюнча комитетинин жыйынында депутат Шайлообек Атазов Экономика министринин орун басары Руслан Татиковдон KOICA уюмунун ишмердүүлүгү тууралуу сурап жатып, минкабминдин мүчөлөрү гипнозго түшкөндөй эч нерсе билишпейт деп сындады.

Жыйында Руслан Татиков КР менен Кореянын ортосунда кайтарымсыз жардам жөнүндө алкактык макулдашууга кошумча макулдашууну радификациялоо тууралуу КРнын мыйзам долбоорун киргизүүгө уруксат сурады.

Анын айтымында, KOICA 1991-жылдан баштап КРга 45 млн доллар кайтарымсыз жардам берген жана ал Айыл-чарба, билим берүү, саламаттык сактоо секторлоруна жумшалган.

Депутат Татиковдон берилген 45 млн доллар грант каякка жумшалгандыгы тууралуу сураганда министрдин орун басары көпкө чейин жооп бере албады. Андан кийин депутат Тышкы иштер министринин орун басары Ниязалиев Нурандан Ысык-Көлдө KOICA өкүлдөрү курууну пландап жаткан өрт өчүрүү станциясынын жаңы имаратынын курулушу тууралуу сураганда Ниязалиевдин андан кабары жок болуп “тактап берейин” деген жообун айтты.

«Тактабасаңыздар эмнеге келесиздер? Төрага, көрдүңүзбү булардын деңгээлин, комитетке гипноздоп койгон сыяктуу келишет. Эч бир маалымат билишпейт, тактайм деп жүрө беришет», – деди депутат.  

• Эскерте кетсек, 1992-жылдан 2020-жылга чейин Кыргызстан жалпысынан чет өлкөдөн 11.48 млрд долларлык финансылык жардам алган. Кыргызстанга келген тышкы жардамдын жалпы көлөмүнүн 30 %ы же 3.43 млрд доллары гранттык каражаттар, ал эми 70%ы же 8.04 млрд доллары кредиттик ресурстар болгон.