Иран өкмөтү КРга деңизге чыгууга Бандар-Аббас портунан жер тилкесин бөлүп берүү жана тиешелүү инфратүзүмдү камсыздоо чечимин кабыл алганын Иран Ислам Республикасынын тышкы иштер министри Хоссейн Амир Абдоллахиян КРнын тышкы иштер министри Руслан Казакбаев менен болгон жолугушуусунда билдиргенин министрликтин маалымат кызматы кабарлады.

Министрлер 23-сентябрда Нью-Йорк шаарындагы БУУнун Башкы Ассамблеясынын 76-сессиясынын алкагында жолугушкан. Руслан Казакбаев ирандык кесиптешин жогорку кызматка дайындалышы менен куттуктап, ишине ийгиликтерди каалады. Иран тарап Кыргызстанга ШКУнун толук кандуу мүчөсүнө коюлган анын талапкерлигин колдогондугу үчүн ыраазычылык билдирди.

Ирандын Тышкы иштер министри Иран өкмөтүнүн Кыргызстанга транзиттик (же Кыргызстандан) товарларды жеткирүү үчүн Бандар-Аббас портунан жер тилкесин бөлүп берүү жана тиешелүү инфратүзүмдү камсыздоо чечими тууралуу кабарлады.

Министр Казабаев өлкөлөр ортосундагы транзиттик жана транспорттук потенциалды пайдалануунун маанилүүлүгүн белгилеп, соода өсүшүнө өбөлгө түзгөн Иран – Түркмөнстан – Өзбекстан – Кыргызстан темир жол коридорун колдонууга кызыкдар экендигин белгиледи. Ошондой эле тараптар Бишкекте Иран соода борборун ачуу маселесин талкуулашты.

• Эскерте кетсек, буга чейин Пакистан Кыргызстандын Карачидеги жана Гвадардагы деңиз портторуна чыгуусун камсыз кылууга даяр экендигин да билдирген болчу. Бирок конкреттүү эч кандай аракеттер жасалган эмес.