«Кумтөр Голд Компани» ЖАКтын жетекчилиги кендеги учурдагы кырдаалга расмий билдирүү жасады.

Компаниянын жетекчилиги өз билдирүүсүндө «Кыргызалтын» ААКсын Лондондун баалуу металлдар рыногунун катышуучуларынын ассоциациясынын (LBMA) ишенимдүү жеткирүүчүлөрүнүн тизмесинен чыгаруу маселеси боюнча комментарий берди.

«Кыргызалтын» ААКсынын Good Delivery List ишенимдүү жеткирүүчүлөр тизмесинен чыгып калышы убактылуу маселе. Убактылуу четтетүүнүн негизги себеби – «Stone X» компаниясынын чыгымдарын жабуу боюнча жарандык-укуктук доосуна байланыштуу. Маселени тынчтык жолу менен чечүү мүмкүндүгүн «Stone X» өз кайрылууларында эки жолу билдирген. Жакын арада күтүлүп жаткан сүйлөшүүлөр кырдаалды жөнгө салууга мүмкүндүк берет жана «Кыргызалтын» ААКсына ишенимдүү жеткирүүчү макамы кайтарылат деп айтылат Кумтөрдүн билдирүүсүндө.

Кумтөрдөн билдиргендей, бул чечим (убактылуу четтетүү боюнча), «Кыргызалтын» ААКтын алтын сатуу укугун жана КРнын суверендүү укуктарын да чектебейт, ошондой эле эч кандай субъектке баалуу металлдар рыногундагы көптөгөн эл аралык платформалардын алкагында\биржалар\рынокторундагы экинчи соодадан КРнын алтын сатып алууга тыюу салбайт (Баалуу металлдар рыногунун Лондон ассоциациясынан тышкары).

Эскерте кетсек, Лондондун баалуу металлдар рыногунун катышуучуларынын ассоциациясы (LBMA) 17-сентябрдан тарта «Кыргызалтын» ААКнын ишенимдүү жеткирүүчүлөрдүн тизмесинен алып салган болчу. «Кыргызалтын» камсыздоо программасын жоопкерчиликтүү аткарбагандыгы үчүн тизмеден чыгарылган.