«Альянс Алтын» Талас облусунун экологиясын колдоого 9.7 млн сомдон ашык каражат бөлдү
«Жерүй» кенин иштеткен «Альянс Алтын» компаниясы үстүбүздөгү жылдын II кварталында Талас аймактык айлана-чөйрөнү коргоо башкармалыгына 9.7 млн сомдон ашык үзгүлтүксүз берилчү экологиялык төлөмдөрдү төлөдү. Бул тууралуу компаниядан билдиришти.
Мындан тышкары, компания атайын рекультивация фондуна 1 млн 215 миң сом өлчөмүндөгү ар айдагы пландалган төлөмдөрдү төлөгөн. 9-сентябрга карата атайын эсепте 26 млн 730 миң сом топтолгон.
Ошондой эле «Альянс Алтын» бардык зарыл болгон экологияны колдоого багытталган төлөмдөрдү үзгүлтүксүз жүргүзүп жатканын маалымдады.
Калдык сактоочу жайдын аймагындагы кайра иштетүүчү комплекстин аймагына автоматташтырылган метеорологиялык станция (АМС) кайра орнотулду. Негизги климатологиялык параметрлер автоматтык режимде жазылат, ошондой эле маалыматтарды иштеп чыгуу жана кабыл алуу үчүн ал заматта Борбордук-Азиялык Жерди прикладдык изилдѳѳ институтунун (БАЖПИИ) компьютердик борборуна жөнөтүлөт.
Калдык сактоочу жайдагы автоматташтырылган метеорологиялык станция
«Тарыхый-маданий мурас объекттерин сактоо максатында Кулун-Эмбес аймагында жайгашкан «Бакай» Күмбөзүнүн айланасындагы маалымат тактасы жана тосмо да калыбына келтирилди», – деп билдиришти компаниядан.
«Бакай» Күмбөзү реконструкциялоонун алдында:
«Бакай» Күмбөзү реконструкциялоодон кийин:
Маалыматка ылайык, скважиналар да дайыма көзөмөлдө турат. Ал кудуктарда жер астындагы суулар табылган эмес, бул демек, калдык сактоочу жайга коюлган геомембрананын бүтүндүгүн тастыктайт.
Мындан тышкары, «Жерүй» башкармалыгынын чарбасын жана ичүүчү суу менен камсыздоочу жер астындагы булактардан алынган ичүүчү сууга да мониторинг жүргүзүлгөн. Ичүүчү суу белгиленген коопсуздук көрсөткүчтөрүнө ылайык келет.
Бардык көрсөткүчтөрдү квартал сайын көзөмөлдөгөн «Чүй экологиялык лабораториясы» ЖЧК «Жерүй» кенин иштетүү айлана-чөйрөгө жана экологияга эч кандай терс таасирин тийгизбейт деп билдирет.
