Депутаттар Архитектура, курулуш жана турак жай агенттигинин ишине нааразы – жыйынтык жок
Архитектура, курулуш жана турак жай – коммуналдык чарба мамлекеттик агенттигинин статс-катчысы Самат Бөрүбаевге бүгүн, 6-октярдагы ЖКнын жыйынында бир катар депутаттар суроолорун беришип, анын айткан жоопторуна, өкмөттүн жасаган жумуштарына канааттанышкан жок.
Мисалы, Оштогу Жапалак айыл өкмөтүнүн калкын таза суу менен камсыз кылуу боюнча депутат Айбек Осмонов статс-катчынын жоопторуна канааттанган жок жана туура эмес маалыматтарды бергенине нааразы болду.
«Отуруп алып эле жалган сүйлөй бересиңерби, тендерди жакында өткөрдүңөр го. Кантип иш жүрүп жатат деп айтып атасыңар? Жалган айтпагыла, Жапалакты таза суу менен камсыз кылууга 60 млн сом эмес 6 млн доллар бөлүнгөн. Жумуш аягына чыга элек эмес, баштала элек. Так даана жыйынтык менен келгиле», – деди.
Самат Бөрүбаевдин берген маалыматына ылайык, КРда суу менен камсыздалбай калган 645 айыл бар. Суу менен камсыз кылуу боюнча приоритеттүү айылдарды 2024-жылга чейин бүтүү пландалууда.
Ал эми депутат Шайлообек Атазов болсо Оштун Төлөйкөн айыл өкмөтүндөгү таза суу жоктугун айтып нааразы болду. Анын айтымында, ал жерде эхинококк, сары оору, ич оору деген оорулар аябай кеңири жайылган.
Самат Бөрүбаев болсо ал аймактарда 2005-жылдан бери жумуш жүрүп келе жатат деп билдирди.
«2005-жылдан бери жумуш жүрүп келе жатса, ал министрди дароо камаш керек экен. Ал жерде 5 насос талкаланган. Алып бербейсиңерби, 8 млн сом турат экен. Суунун жетишсиздигинен жүздөгөн гектар жердеги бактар куурап жатат. Балдар ооруп, ооруканага батпай жатат. Депутаттарды алдаган силер, элди жөн эле алдап коесуңар», – деди Атазов.
Бейшеналы Нурдинов болсо Нарындагы сапатсыз курулган, жарылып аткан суу түтүктөрү боюнча статс-секретарга суроо узатты. Алган жообуна нааразы болгон депутат аймактагы көйгөйлөрдүн, министрликтин берген отчету туура эмес экенин баса белгиледи.
«Эмнеге силерде туура эмес маалыматтар кетип жатат. Силердин берген отчетунарда 7 км канализация, 1 насостук станция бүттү, 150 кудук оңдолду деп берилип жатат. Эч кандай андай болгон эмес, текшериңиз», – деди.
