Улуттук энергохолдинг: Октябрдын башында Тажикстандан электр энергиясы келген
Октябрдын башында Тажикстандан электр энергиясы келген. Бул тууралуу Улуттук энергохолдингден билдиришти. Эскерте кетсек, бүгүн, 6-октябрдагы ЖКнын жыйынында Дастан Бекешев Тажикстандан электр энергиясынын келгени тууралуу маалымат жоктугун айткан болчу.
Компаниянын берген маалыматына ылайык, Токтогул суу сактагычында суунун аздыгына байланыштуу Улуттук энергохолдинг Борбор Азиянын энергетикалык шакекчесине кирген бардык өлкөлөр менен Кыргызстанга электр энергиясын жеткирүү маселелерин караштырууда.
«Октябрь айынын башынан бери Тажикстандын энергетикалык системасынан электр энергиясы алына баштаган. Импорттолгон электр энергиясы Баткен жана Ош облустарынын лимиттен ашкан бөлүгүн камсыз кылууну шарттайт. Тажикстандан алынып жаткан электр энергиясы Борбор Азиянын Бириккен Энергетикалык Системасынын алкагындагы макулдашууларга жана ченемдик-укуктук актыларга ылайык, импорттук же пландан тышкаркы агым катары каралышы мүмкүн», – деп айтылат билдирүүдө.
