Салык кызматы текшерүүгө алган жарандын банктагы сыр маалыматын алуу мүмкүнчүлүгүнө ээ болот

Салык кызматы расмий текшерүүгө алынган салык төлөөчүнүн банктык сыр маалыматтарын ала алат. Бул тууралуу бүгүн, 7-октябрда маалымат жыйынында Экономика министрлигинин салык саясаты башкармалыгынын башчысы Кубанычбек Исабеков билдирди.  

Анын айтымында, алар бул компромисске Кыргызстандын банктар Биримдиги менен чогуу келишкен. «Салык кызматынын банктар менен өз ара аракеттенүү тартиби Министрлер Кабинети тарабынан аныкталат, эгерде текшерүү боюнча расмий буйрук болгон болсо, аны банктар «Түндүк» системасы аркылуу текшере алат. Ошондой эле ага ынангандан кийин эч кандай соттун чечими жок эле кардардын сыр маалыматтарын бере алышат», – деди Исабеков.  

Экономика жана финансы министринин орун басары Бекболот Алиев кошумчалагандай, статистика боюнча жылына 3-4% гана салык төлөөчүлөр текшерилет, башкача айтканда, бул бардык салык төлөөчүлөрдү камтыбайт.  

«Салык кодексинде Салык кызматынын укуктары менен милдеттеринде, биз кандайдыр бир сырды, анын ичинде салыктык жана банктык сырды сактоого милдеттүү экенибиз көрсөтүлгөн, анткени текшерүүнүн жүрүшүндө тигил же бул жол менен баары бир салык төлөөчү бул маалыматтарды берет. Бизге банктык сыр маалыматтар түшкөндө,  ал салык сырына айланат жана эгерде ал бузулса, кызматкер кылмыш жоопкерчилигине тартылат», –  деди Салык кызматынын методология бөлүмүнүн башчысы Нурлан Умтулов.

Умтулов кошумчалагандай, ведомствонун сайтында эскертүү маалыматтарын текшерүү кызматы бар. Каалаган салык төлөөчү, каалаган жаран кирип, буйруктарды номери, датасы боюнча текшере алат, алардын баары маалымат системасында жазылган.  

Эске салсак, Кыргызстандын банктар Бирикмеси өзүнүн Фейсбук барагында Мамлекеттик салык кызматы Салык кодексинин 126-беренесине «банктын кардарлары тууралуу дээрлик бардык маалыматты» ачыктоого жол ачкан түзөтүүлөрдү киргизүүнү сунуштап жатканын тынчсыздануу менен билдирген жарыясынан кийин социалдык тармактарда, ММКда бул чоң талкууга түшкөн болчу.