Бишкектин таштанды полигонун рекультивациялоо үчүн Европа өнүктүрүү банкы бөлгөн 22 млн евронун 10.5 млн доллары сарпталган, бирок иш жүзүндө эч нерсе болгон эмес. Бул тууралуу борбор калаанын мэри Айбек Жунушалиев Бишкекте өткөн маалымат жыйынында билдирди.

«Биз тендердин мыйзамдуулугун изилдөө жана полигондун түтөгөн жерлерин калыбына келтирүү жана консервациялоо боюнча подрядчы болгон эстониялык Ehitusfirma Rand Ja Tuulberg AS компаниясы менен келишимди бузуу маселесин көтөрдүк. Алар өнөктөш катары бир катар макулдашылган иштерди аткарышы керек болчу, бирок иш жүзүндө аткарышкан жок. Керек болсо биз сотко берүүгө даярбыз», – деди ал.

Мэриядан мурдараак билдиришкендей, кийим тигүүчү цехтерден таштандылар полигонго системалуу түрдө уруксатсыз ташталгандан улам, санитардык полигондун ар кайсы жерлеринде таштанды өрттөрү уланып жатат.

Шаар башчысы белгилегендей, азыр Бишкектеги таштанды жай катастрофалык абалда турат.

Эске салсак, 2013-жылы Кыргызстандын өкмөтү менен Европа реконструкциялоо жана өнүктүрүү банкы «Бишкек шаарындагы катуу таштандыларды башкаруу системасын жакшыртуу» долбоорун каржылоо үчүн кредиттик келишимге кол коюшкан. Долбоордун жалпы наркы 22 млн еврону түзүп, бул акчанын жарымы грант болсо, экинчиси Европалык Реконструкция жана Өнүктүрүү Банкынан (ЕРӨБ) кредит түрүндө келген.

Мурда борбор калаанын мэриясынан билдиришкендей, подрядчы компания пандемияга байланыштуу 14 ай токтоп калган, бирок июнь айынын ортосунда ишин жандандырган, ошого байланыштуу келишим 17 айга чейин узартылышы күтүлгөн эле.