2021-жылдын 7-октябрында өткөн жылдын октябрына салыштырмалуу көмүрдүн орточо керектөө баасы республика боюнча орточо эсеп менен алганда бир тонна  үчүн  715 сомго же 16%га өстү. Бул тууралуу Улутстатком билдирди.

Муну менен бирге, минималдуу чекене баалар Чаек айылында (бир тоннасы – 2 500 сом), Балыкчы шаарында (бир тоннасы – 4000 сом) Токтогул шаарында (бир тоннасы – 4373 сом) болгону байкалды. Ошол эле учурда, көмүрдүн эң жогорку баасы Ноокат (бир тонна үчүн – 8 390 сом), Баткен (бир тоннасы – 8 377 сом) жана Исфана (бир тоннасы – 6 500 сом) шаарларында катталды.

Көмүргө (импорттук жана жергиликтүү көмүр) карата орточо керектөө бааларынын талдоосу республиканын 18 калк жашоочу пункттарында чекене баалардын жума сайын жүргүзүлүүчү мониторингинин маалыматтарынын негизинде берилген.

Эскерте кетсек, күз-кыш мезгилинде КР 3 млн тонна көмүр жагат, бирок учурда «Кыргызкөмүр» ишканасы 200 миң тонна гана берүүгө даяр. Бул тууралуу «Кыргызкөмүр» мамлекеттик ишканасынын директору Мирлан Жакыпов «Биринчи Радиодогу» мегинде билдирген болчу.

Учурда республикада лицензиясы бар 45тей жеке менчик көмүр казган ишкана бар жана анын ичинен экөө мамлекеттики. Эң чоң көлөмдөгү көмүр «Кара-Кечедеги» бассейнде казылат.