Арбитраждагы жеңиш – Кыргызстан MegaCom иши боюнча 298 млн доллар төлөбөйт
8-октябрда «Penwell Business Limited Кыргыз Республикасына каршы» иши боюнча Жыйынтык арбитраждык чечим чыгарылгандыгын Министрлер Кабинетинин Сот өкүлчүлүгү борбору маалымдады.
Чечимге ылайык, доогердин 298 млн доллар өлчөмүндөгү компенсация тууралуу талабы Арбитраж курамы тарабынан толук көлөмдө четке кагылган. Атап айтканда, Арбитраж курамы токтом кылгандай, КРга инвестиция кылууда Доогер бир нече ирет жергиликтүү өнөктөштөрдүн жардамы аркылуу жана түздөн-түз коррупциялык тажрыйбага кайрылган.
Маалымдасак, Доогер, Penwell Business Ltd оффшордук компаниясы 2017-жылдын июль айында КРга каршы эл аралык арбитраждык териштирүүнү демилгелеген, анда республика доогердин инвестициясын «БиМоКом» ЖЧКга (MegaCom соода маркасы) экспроприация кылган деп билдирген.
Борбор белгилегендей, бул КРнын эгемендүүлүгүнүн 30 жылдык тарыхында коррупциялык практика орун алгандыгынын негизинде чет элдик инвестордун доо талабы толук көлөмдө четке кагылгандыгы боюнча алгачкы окуя болуп саналат.
Бул маанилүү жеңиш Министрлер Кабинетинин Сот өкүлчүлүгү борборунун командасынын жана КР тарабынан тартылган юридикалык өкүлдөрдүн – Willkie Farr & Gallagher LLP эл аралык юридикалык фирмасынын ырааттуу жана натыйжалуу ишине жараша орун алды.
