Кыргызстан менен Румыния кош салык салууну жоюуну талкуулашты
23-26-февралда Бухарест шаарында Кыргызстан менен Румыниянын расмий делегациялары кирешеге салынуучу салыктар боюнча кош салык салууну жоюу жана салыктарды төлөөдөн качууну болтурбоо тууралуу Макулдашууга кол коюу боюнча сүйлөшүүлөрдү өткөрүштү. Бул тууралуу Экономика жана коммерция министрлигинен билдиришти.
Жолугушуунун жүрүшүндө тараптар документтин долбоорун кеңири талкуулап, анын негизги жоболору боюнча принципиалдуу макулдашууга жетишти. Макулдашууга ар бир өлкөдө каралган ички жол-жоболор аяктагандан кийин кол коюлат.
Документтин негизги максаты — эки өлкөдө иш алып барган чарба субъекттеринин кирешелерине карата кош салык салууну жоюу. Бул Кыргыз Республикасы менен Румыниянын ортосундагы экономикалык кызматташтыкты өнүктүрүүгө жана инвестициялык жагымдуулукту жогорулатууга багытталган.
Мындан тышкары, Макулдашуу резиденттерди дискриминациялык салык салуудан коргоону, салыктарды төлөөдөн качуунун алдын алууну жана эки өлкөнүн ыйгарым укуктуу органдарынын ортосунда маалымат алмашууну камтыйт.
